چند برتن ہیں چارپائی ہے

چند برتن ہیں چارپائی ہے

یہی دولت یہی کمائی ہے

پیار کرتے ہیں زندگی تجھ سے

جانتے ہیں کہ تو پرائی ہے

زخم نکھرے گا درد بولے گا

اس کی خوشبو کہیں سے آئی ہے

اس کو توڑو کہ اب اسے پھاندو

تم نے دیوار خود بنائی ہے

خواب کیسے کوئی مکمل ہو

نیند آئی نہ موت آئی ہے

اے محبت وہاں خدا ہی نہیں

تو نے گردن جہاں جھکائی ہے

فون پر ہو کہ صرف چائے پر

کیا ملن ہے یہ کیا جدائی ہے

کیسے توقیرؔ شاعری ہو بھلا

جب وفا ہے نہ بے وفائی ہے