chand ghanTe shor o ghul ki zindagi chaaron taraf

chand ghanTe shor o ġhul kī zindagī chāroñ taraf

aur phir tanhā.ī kī ham-sā.egī chāroñ taraf

ghar meñ saarī raat be-āvāz hañgāma na pūchh

maiñ akelā niiñd ġhā.eb barhamī chāroñ taraf

dekhne niklā huuñ apnā shahr jañgal kī tarah

duur tak phailā huā hai aadmī chāroñ taraf

mere darvāze pe ab taḳhtī hai mere naam kī

ab na bhaTkegī mirī āvārgī chāroñ taraf

mere ghar meñ hī rahā tā-umr merā vāqi.a

apnī apnī varna arz-e-vāqa.ī chāroñ taraf

chāndnī rātoñ kī bastī meñ huuñ maiñ sahmā huā

ḳhauf se lipTī huī hai raushnī chāroñ taraf

hai koī chehra shanāsā DhūñDtā huuñ bhiiḌ meñ

itnī raunaq meñ bhī ik be-raunaqī chāroñ taraf

pahle merī baat hañs kar Taal bhī dete the vo

lekin ab tasdīq merī baat kī chāroñ taraf

bazm meñ yuuñ to sabhī the phir bhī 'āmir' der tak

tere jaane se rahī ik ḳhāmushī chāroñ taraf

chand ghanTe shor o ghul ki zindagi chaaron taraf

aur phir tanhai ki ham-saegi chaaron taraf

ghar mein sari raat be-awaz hangama na puchh

main akela nind ghaeb barhami chaaron taraf

dekhne nikla hun apna shahr jangal ki tarah

dur tak phaila hua hai aadmi chaaron taraf

mere darwaze pe ab taKHti hai mere nam ki

ab na bhaTkegi meri aawargi chaaron taraf

mere ghar mein hi raha ta-umr mera waqia

apni apni warna arz-e-waqai chaaron taraf

chandni raaton ki basti mein hun main sahma hua

KHauf se lipTi hui hai raushni chaaron taraf

hai koi chehra shanasa DhunDta hun bhiD mein

itni raunaq mein bhi ek be-raunaqi chaaron taraf

pahle meri baat hans kar Tal bhi dete the wo

lekin ab tasdiq meri baat ki chaaron taraf

bazm mein yun to sabhi the phir bhi 'amir' der tak

tere jaane se rahi ek KHamushi chaaron taraf