چند لمحوں کی زندگی ہے ابھی

چند لمحوں کی زندگی ہے ابھی

ان چراغوں میں روشنی ہے ابھی

اپنی معصوم سی تمنا کے

خون سے اک غزل لکھی ہے ابھی

ایک مدت سے ہے شریک سفر

زندگی پھر بھی اجنبی ہے ابھی

خشک موسم کی دل لگی کے لئے

چشم گل کچھ تو شبنمی ہے ابھی

راکھ سے جسم میں کہیں نہ کہیں

ایک چنگاری سی دبی ہے ابھی

اپنی تہذیب کے کچلنے کو

منتظر بیسویں صدی ہے ابھی

دل کی ویران رہ گزاروں پر

کوئی آہٹ سی آ رہی ہے ابھی

سب تو عرفانؔ لٹ چکا لیکن

ایک سرمایۂ خودی ہے ابھی