chand yaaden hain baam-o-dar ke siwa

chand yādeñ haiñ bām-o-dar ke sivā

zehn meñ kuchh nahīñ khañDar ke sivā

sar bahut the jahān-e-fānī meñ

dar na thā koī tere dar ke sivā

sab saqīfa meñ nazr kar aa.e

apnī tārīḳh ko nazar ke sivā

sar meñ saudā thā Tik ke baiTh raheñ

pair meñ kuchh na thā safar ke sivā

ek shahr-e-ḳhatar se aage bhī

kuchh na thā shahr-e-pur-ḳhatar ke sivā

har baḌe shahr ke makānoñ meñ

aarzū kuchh nahīñ hai ghar ke sivā

chaliye sab tark kar diyā ham ne

ik tamannā-e-muḳhtasar ke sivā

maiñ bhī huuñ āb-o-ḳhāk kā putlā

kyā hai duniyā bhī bahr-o-bar ke sivā

tum samajhte the qāfila jis ko

bas vahāñ ham the dīda-var ke sivā

anjuman kā gumāñ thā jis pe vahāñ

thā vo kaun ek do nafar ke sivā

aañkh ke ḳhol meñ samātā kyā

ek insān kī nazar ke sivā

guftugū der tak rahī lekin

kuchh na thī baat agar magar ke sivā

vahāñ amboh-e-ġham meñ kaun na thā

sab hī the ek ham-safar ke sivā

yuuñ to manzil bhī thī irāda bhī

sāmne sab thā ik Dagar ke sivā

rāh-rau sab qadam qadam chhūTe

nahīñ ab koī rāhbar ke sivā

maiñ huuñ baaqī luTe hue ghar meñ

kyā milā un ko māl-o-zar ke sivā

chand yaaden hain baam-o-dar ke siwa

zehn mein kuchh nahin khanDar ke siwa

sar bahut the jahan-e-fani mein

dar na tha koi tere dar ke siwa

sab saqifa mein nazr kar aae

apni tariKH ko nazar ke siwa

sar mein sauda tha Tik ke baiTh rahen

pair mein kuchh na tha safar ke siwa

ek shahr-e-KHatar se aage bhi

kuchh na tha shahr-e-pur-KHatar ke siwa

har baDe shahr ke makanon mein

aarzu kuchh nahin hai ghar ke siwa

chaliye sab tark kar diya hum ne

ek tamanna-e-muKHtasar ke siwa

main bhi hun aab-o-KHak ka putla

kya hai duniya bhi bahr-o-bar ke siwa

tum samajhte the qafila jis ko

bas wahan hum the dida-war ke siwa

anjuman ka guman tha jis pe wahan

tha wo kaun ek do nafar ke siwa

aankh ke KHol mein samata kya

ek insan ki nazar ke siwa

guftugu der tak rahi lekin

kuchh na thi baat agar magar ke siwa

wahan amboh-e-gham mein kaun na tha

sab hi the ek ham-safar ke siwa

yun to manzil bhi thi irada bhi

samne sab tha ek Dagar ke siwa

rah-rau sab qadam qadam chhuTe

nahin ab koi rahbar ke siwa

main hun baqi luTe hue ghar mein

kya mila un ko mal-o-zar ke siwa