charagh bujhne lage aur chhai tariki

charāġh bujhne lage aur chhā.ī tārīkī

chukā rahā thā maiñ qīmat havā se yaarī kī

tū soch bhī nahīñ saktā jis ehtimām ke saath

kaTe shajar pe parindoñ ne āh-o-zārī kī

vo jis kā ishq mirā juzv-e-rūh ban gayā thā

usī ne mujh se mohabbat bhī iḳhtiyārī kī

tumhārā vajd meñ aanā faqat dikhāvā thā

vo kaifiyat hī nahīñ thī jo ḳhud pe taarī kī

tumhāre shahr kī hurmat kā paas rakhte hue

adū koī na banāyā sabhī se yaarī kī

jahāñ ḳhudā kī azaañ ho rahī ho giit kī nazr

sunegā kaun vahāñ par sadā bhikārī kī

charagh bujhne lage aur chhai tariki

chuka raha tha main qimat hawa se yari ki

tu soch bhi nahin sakta jis ehtimam ke sath

kaTe shajar pe parindon ne aah-o-zari ki

wo jis ka ishq mera juzw-e-ruh ban gaya tha

usi ne mujh se mohabbat bhi iKHtiyari ki

tumhaara wajd mein aana faqat dikhawa tha

wo kaifiyat hi nahin thi jo KHud pe tari ki

tumhaare shahr ki hurmat ka pas rakhte hue

adu koi na banaya sabhi se yari ki

jahan KHuda ki azan ho rahi ho git ki nazr

sunega kaun wahan par sada bhikari ki