charagh-e-sham hi tanha nahin hai

charāġh-e-shām hī tanhā nahīñ hai

havā maiñ ne bhī ghar dekhā nahīñ hai

vo bādal hai magar is dasht-e-jāñ par

abhī dil khol kar barsā nahīñ hai

mohabbat ik hisār-e-be-nishāñ hai

lahū meñ dā.era bantā nahīñ hai

bikhartī jā rahī huuñ aur ḳhush huuñ

simaTne meñ koī sachchā nahīñ hai

ḳhoshā ai rū-e-shāḳh-e-sabz tujh par

sarāb-e-ā.īna khultā nahīñ hai

tujhe dekhā hai jab se shām-ālūda

mirī āñkhoñ meñ din utrā nahīñ hai

maiñ kyuuñ dekhūñ hujūm-e-mahr-o-mah ko

mirī tanhā.iyoñ meñ kyā nahīñ hai

nahīñ jaate haiñ dukh ab aa ke ghar se

ki ye aanā tirā aanā nahīñ hai

bhaTak jā.eñgī rāteñ jis ke hāthoñ

abhī us ḳhvāb kā charchā nahīñ hai

zabāñ gum thī asar ke zā.iqoñ meñ

tirā mujrim lab-e-goyā nahīñ hai

charagh-e-sham hi tanha nahin hai

hawa main ne bhi ghar dekha nahin hai

wo baadal hai magar is dasht-e-jaan par

abhi dil khol kar barsa nahin hai

mohabbat ek hisar-e-be-nishan hai

lahu mein daera banta nahin hai

bikharti ja rahi hun aur KHush hun

simaTne mein koi sachcha nahin hai

KHosha ai ru-e-shaKH-e-sabz tujh par

sarab-e-aina khulta nahin hai

tujhe dekha hai jab se sham-aluda

meri aankhon mein din utra nahin hai

main kyun dekhun hujum-e-mahr-o-mah ko

meri tanhaiyon mein kya nahin hai

nahin jate hain dukh ab aa ke ghar se

ki ye aana tera aana nahin hai

bhaTak jaengi raaten jis ke hathon

abhi us KHwab ka charcha nahin hai

zaban gum thi asar ke zaiqon mein

tera mujrim lab-e-goya nahin hai