charagh-e-shauq jala raat ke asar se nikal

charāġh-e-shauq jalā raat ke asar se nikal

safar na rok tilismāt-e-rahguzar se nikal

kabhī to dast-e-hinā.ī se likh visāl kī rut

kabhī to shīsha-e-jāñ TūTne ke Dar se nikal

javāz DhūñD na apnī sadā bikharne kā

hayāt mohr-ba-lab dast-e-chāra-gar se nikal

zarā sī vus.at-e-idrāk meñ na gum ho jā

is imtihāñ se guzar hairat-e-ḳhabar se nikal

tire ḳhayāl meñ huuñ shahr-e-raftagāñ tū bhī

kisī khañDar se ubhar aks-e-bām-o-dar se nikal

zakāt-e-ḳhvāb meñ de dī haiñ maiñ ne āñkheñ bhī

ab ai jahān-e-digar hīta-e-nazar se nikal

nigāh-e-zard meñ ug sabz ḳhvāb kī koñpal

gulāb-e-shāḳh phir ujḌe hue shajar se nikal

bañdhe haiñ shaam sutūnoñ se sub.h ke taare

jamāl-e-yār kisī naqsh-e-motabar se nikal

fasīl-e-shahr pe aks-e-shab-e-ta.assuf hai

najāt-e-ġham kī kiran ḳhema-e-sahar se nikal

charagh-e-shauq jala raat ke asar se nikal

safar na rok tilismat-e-rahguzar se nikal

kabhi to dast-e-hinai se likh visal ki rut

kabhi to shisha-e-jaan TuTne ke Dar se nikal

jawaz DhunD na apni sada bikharne ka

hayat mohr-ba-lab dast-e-chaara-gar se nikal

zara si wusat-e-idrak mein na gum ho ja

is imtihan se guzar hairat-e-KHabar se nikal

tere KHayal mein hun shahr-e-raftagan tu bhi

kisi khanDar se ubhar aks-e-baam-o-dar se nikal

zakat-e-KHwab mein de di hain main ne aankhen bhi

ab ai jahan-e-digar hita-e-nazar se nikal

nigah-e-zard mein ug sabz KHwab ki konpal

gulab-e-shaKH phir ujDe hue shajar se nikal

bandhe hain sham sutunon se subh ke tare

jamal-e-yar kisi naqsh-e-motabar se nikal

fasil-e-shahr pe aks-e-shab-e-tassuf hai

najat-e-gham ki kiran KHema-e-sahar se nikal