charagh jal bhi raha hai hawa ka Dar bhi hai

charāġh jal bhī rahā hai havā kā Dar bhī hai

mirī duāoñ pe lekin tirī nazar bhī hai

gharoñ ko phūñkne vaale zarā ye dekh bhī le

usī galī meñ sunā hai ki terā ghar bhī hai

maiñ ghar se niklūñ to be-ḳhauf ho nikaltā huuñ

ki merī maañ kī duā merī ham-safar bhī hai

abhī se fitna-e-duniyā se Dar ga.e yaaro

abhī to fitna-e-aflāk kī ḳhabar bhī hai

usī ke pyaar se raushan hai zindagī merī

usī ke pyaar se lekin bahut sā Dar bhī hai

'nadīm' aas meñ baiThe ki phir se jī uTTheñ

ki us ke haath meñ sunte haiñ ye hunar bhī hai

charagh jal bhi raha hai hawa ka Dar bhi hai

meri duaon pe lekin teri nazar bhi hai

gharon ko phunkne wale zara ye dekh bhi le

usi gali mein suna hai ki tera ghar bhi hai

main ghar se niklun to be-KHauf ho nikalta hun

ki meri man ki dua meri ham-safar bhi hai

abhi se fitna-e-duniya se Dar gae yaro

abhi to fitna-e-aflak ki KHabar bhi hai

usi ke pyar se raushan hai zindagi meri

usi ke pyar se lekin bahut sa Dar bhi hai

'nadim' aas mein baiThe ki phir se ji uTThen

ki us ke hath mein sunte hain ye hunar bhi hai