charagh jo bhi jala hai hawa ke sae mein

charāġh jo bhī jalā hai havā ke saa.e meñ

sadā rahā hai farozāñ duā ke saa.e meñ

hameñ miTā na sakegī ye gardish-e-daurāñ

azal se ham haiñ atā-e-ḳhudā ke saa.e meñ

faroġh-e-sub.h kā aalam hai vajh-e-māyūsī

ujāle sahme haiñ kis badduā ke saa.e meñ

kabhī to hogā bahāroñ kā is taraf ko nuzūl

ḳhizāñ-rasīda chaman hai havā ke saa.e meñ

milī na tauba kī mohlat tamām umr kabhī

hamārī zindagī guzrī ḳhatā ke saa.e meñ

hijāb-e-nāla-e-shab muntashir rahe kab tak

ḳhamoshiyāñ bhī nihāñ haiñ sadā ke saa.e meñ

sa.ūbatoñ se gurezāñ ho kis liye ai 'zafar'

vajūd apnā hai jab ki qazā ke saa.e meñ

charagh jo bhi jala hai hawa ke sae mein

sada raha hai farozan dua ke sae mein

hamein miTa na sakegi ye gardish-e-dauran

azal se hum hain ata-e-KHuda ke sae mein

farogh-e-subh ka aalam hai wajh-e-mayusi

ujale sahme hain kis baddua ke sae mein

kabhi to hoga bahaaron ka is taraf ko nuzul

KHizan-rasida chaman hai hawa ke sae mein

mili na tauba ki mohlat tamam umr kabhi

hamari zindagi guzri KHata ke sae mein

hijab-e-nala-e-shab muntashir rahe kab tak

KHamoshiyan bhi nihan hain sada ke sae mein

saubaton se gurezan ho kis liye ai 'zafar'

wajud apna hai jab ki qaza ke sae mein