charagh mehman hain raat bhar ke makan munawwar nahin rahega

charāġh mehmāñ haiñ raat bhar ke makāñ munavvar nahīñ rahegā

ise basā lo dil-o-nazar meñ ki phir ye manzar nahīñ rahegā

zaḳhīra-e-āb par hai dār-o-madār bārish ke mausamoñ kā

kahāñ se ā.eñge abr ghir kar agar samundar nahīñ rahegā

huā hai us se mirā tasādum to kyoñ use nā-tamām chhoḌūñ

fasīl raste kī TuuT jā.egī yā mirā sar nahīñ rahegā

rahī jo tahsīl-e-āb-o-dāna kī shart ḳhāna-ba-dosh honā

kisī parinde kā āshiyāna chaman ke andar nahīñ rahegā

kisī kā dīvār par tasarruf koī huā bām-o-dar pe qābiz

yahī makīnoñ kī ḳhū rahī to yaqīn hai ghar nahīñ rahegā

isī se qaa.em hai shaan us kī yahī hai 'gulzār' aan us kī

rahegī kyā aabrū sadaf kī jo us meñ gauhar nahīñ rahegā

charagh mehman hain raat bhar ke makan munawwar nahin rahega

ise basa lo dil-o-nazar mein ki phir ye manzar nahin rahega

zaKHira-e-ab par hai dar-o-madar barish ke mausamon ka

kahan se aaenge abr ghir kar agar samundar nahin rahega

hua hai us se mera tasadum to kyon use na-tamam chhoDun

fasil raste ki TuT jaegi ya mera sar nahin rahega

rahi jo tahsil-e-ab-o-dana ki shart KHana-ba-dosh hona

kisi parinde ka aashiyana chaman ke andar nahin rahega

kisi ka diwar par tasarruf koi hua baam-o-dar pe qabiz

yahi makinon ki KHu rahi to yaqin hai ghar nahin rahega

isi se qaem hai shan us ki yahi hai 'gulzar' aan us ki

rahegi kya aabru sadaf ki jo us mein gauhar nahin rahega