charagh sham se aaKHir jalaen kis ke liye

charāġh shaam se āḳhir jalā.eñ kis ke liye

koī na aa.egā āñkheñ bichhā.eñ kis ke liye

khiñchā khiñchā nazar aatā hai ham se har āñchal

sitāre toḌ ke laa.eñ to laa.eñ kis ke liye

nahīñ hai koī hameñ zindagī kā shauq magar

ham apnī jaan se jaa.eñ to jaa.eñ kis ke liye

sitam uThāne kā maqsad bhī koī hotā hai

ham āsmān se sharteñ lagā.eñ kis ke liye

ḳhilāf ham nahīñ aḳhtar-shumāriyoñ ke magar

savāl ye hai ki nīñdeñ gañvā.eñ kis ke liye

vafā ik aag hai bachchoñ kā koī khel nahīñ

ham apnā muft meñ dāman jalā.eñ kis ke liye

sharāb ham pe hamesha se hai harām 'alīm'

pata nahīñ ye uThī haiñ ghaTā.eñ kis ke liye

charagh sham se aaKHir jalaen kis ke liye

koi na aaega aankhen bichhaen kis ke liye

khincha khincha nazar aata hai hum se har aanchal

sitare toD ke laen to laen kis ke liye

nahin hai koi hamein zindagi ka shauq magar

hum apni jaan se jaen to jaen kis ke liye

sitam uThane ka maqsad bhi koi hota hai

hum aasman se sharten lagaen kis ke liye

KHilaf hum nahin aKHtar-shumariyon ke magar

sawal ye hai ki ninden ganwaen kis ke liye

wafa ek aag hai bachchon ka koi khel nahin

hum apna muft mein daman jalaen kis ke liye

sharab hum pe hamesha se hai haram 'alim'

pata nahin ye uThi hain ghaTaen kis ke liye