charaghon ka safar hai intizar-e-hasil-e-shab hai lab-e-ju hai

charāġhoñ kā safar hai intizār-e-hāsil-e-shab hai lab-e-jū hai

ki ham par bhī añdhere pāniyoñ meñ raushnī karne kā jaadū hai

khulī āñkhoñ meñ ḳhvāboñ kā jazīra hai ḳhirām-e-aks-e-āhū hai

shab-e-va.ada hai gesū-e-havā-e-yaḳh pareshāñ haiñ ki ḳhushbū hai

sabā sehn-e-chaman meñ aam kartī bhī to kis ke qissa-e-jāñ ko

haqīqat hai ki saarī dāstānoñ meñ kahīñ maiñ huuñ kahīñ tū hai

ba-lafz-e-ḳhāmushī saare khañDar aapas meñ mahv-e-guftugū haiñ aur

siyah mausam zabān-e-sang meñ kahtā hai dekho ālam-e-hū hai

havā-e-tund chāk-e-bādbāñ se narm lahje meñ ye kahtī hai

kisī kā kab bhalā in bāvle aur sar-phire jhoñkoñ pe qaabū hai

mirā naala falak kī azmatoñ se jā milā hai shāyad ai 'shahpar'

sahar nam hai fazā chup hai ki dhānī ghaas ke aariz pe aañsū hai

charaghon ka safar hai intizar-e-hasil-e-shab hai lab-e-ju hai

ki hum par bhi andhere paniyon mein raushni karne ka jadu hai

khuli aankhon mein KHwabon ka jazira hai KHiram-e-aks-e-ahu hai

shab-e-wada hai gesu-e-hawa-e-yaKH pareshan hain ki KHushbu hai

saba sehn-e-chaman mein aam karti bhi to kis ke qissa-e-jaan ko

haqiqat hai ki sari dastanon mein kahin main hun kahin tu hai

ba-lafz-e-KHamushi sare khanDar aapas mein mahw-e-guftugu hain aur

siyah mausam zaban-e-sang mein kahta hai dekho aalam-e-hu hai

hawa-e-tund chaak-e-baadban se narm lahje mein ye kahti hai

kisi ka kab bhala in bawle aur sar-phire jhonkon pe qabu hai

mera nala falak ki azmaton se ja mila hai shayad ai 'shahpar'

sahar nam hai faza chup hai ki dhani ghas ke aariz pe aansu hai