charaghon mein andhera hai andhere mein ujale hain

charāġhoñ meñ añdherā hai añdhere meñ ujāle haiñ

hamāre shahr meñ kaalī havā ne par nikāle haiñ

hameñ shab kāTne kā fan virāsat meñ milā ham ne

kabhī patthar pakā.e haiñ kabhī sapne ubāle haiñ

diloñ meñ ḳhauf hai us kā nazar hai us kī rahmat par

gunāhgāroñ meñ shāmil haiñ magar allāh vaale haiñ

laḌe the saath mil kar ham charāġhoñ ke liye lekin

hamāre ghar añdhere haiñ tumhāre ghar ujāle haiñ

tumhārī yaad se achchhā nahīñ hotā koī aalam

mayassar jin ko ho jaa.e baḌī taqdīr vaale haiñ

mohabbat āḳhirī hal hai hamāre sab masā.il kā

magar ham ne to nafrat ke sañpole dil meñ paale haiñ

bhaḌaktī aag to do chaar din meñ bujh ga.ī thī 'badr'

abhī tak shahr ke manzar na jaane kyuuñ dhuāñle haiñ

charaghon mein andhera hai andhere mein ujale hain

hamare shahr mein kali hawa ne par nikale hain

hamein shab kaTne ka fan wirasat mein mila hum ne

kabhi patthar pakae hain kabhi sapne ubaale hain

dilon mein KHauf hai us ka nazar hai us ki rahmat par

gunahgaron mein shamil hain magar allah wale hain

laDe the sath mil kar hum charaghon ke liye lekin

hamare ghar andhere hain tumhaare ghar ujale hain

tumhaari yaad se achchha nahin hota koi aalam

mayassar jin ko ho jae baDi taqdir wale hain

mohabbat aaKHiri hal hai hamare sab masail ka

magar hum ne to nafrat ke sanpole dil mein pale hain

bhaDakti aag to do chaar din mein bujh gai thi 'badr'

abhi tak shahr ke manzar na jaane kyun dhuanle hain