charche tere KHulus ke duniya mein kam na the

charche tire ḳhulūs ke duniyā meñ kam na the

phir bhī tire karam ke sazā-vār ham na the

hogā koī sharīr sā jhoñkā nasīm kā

jis ne tirī naqāb uThā.ī vo ham na the

muzmar thiiñ tere jaur meñ terī ināyateñ

tere sitam bhī terī navāzish se kam na the

us rāste pe chhoḌ gayā rāhbar mujhe

jis rāste pe aap ke naqsh-e-qadam na the

ma.asūmiyat ne jiinā bhī dushvār kar diyā

nā-karda-kār dil meñ kabhī itne ġham na the

kuchh bojh ban chukī thiiñ tirī kam-nigāhiyāñ

mahfil meñ intishār kā baa.is to ham na the

'kausar' ko bāryābī kā e.azāz mil gayā

pahle hī us pe aap ke ehsān kam na the

charche tere KHulus ke duniya mein kam na the

phir bhi tere karam ke saza-war hum na the

hoga koi sharir sa jhonka nasim ka

jis ne teri naqab uThai wo hum na the

muzmar thin tere jaur mein teri inayaten

tere sitam bhi teri nawazish se kam na the

us raste pe chhoD gaya rahbar mujhe

jis raste pe aap ke naqsh-e-qadam na the

masumiyat ne jina bhi dushwar kar diya

na-karda-kar dil mein kabhi itne gham na the

kuchh bojh ban chuki thin teri kam-nigahiyan

mahfil mein intishaar ka bais to hum na the

'kausar' ko baryabi ka eazaz mil gaya

pahle hi us pe aap ke ehsan kam na the