chashm-e-baatin ka ye ishaara hai

chashm-e-bātin kā ye ishāra hai

ham meñ kuchh bhī nahīñ hamārā hai

us ke fazl-o-karam se hai duniyā

aur duniyā kā har nazārā hai

kis se lenā hai kis ko hai denā

raqs darvesh kā ishāra hai

yuuñ to ḳhālī hai dāman-e-hastī

phir bhī ummīd par guzārā hai

ḳhvāhishoñ ke fareb meñ aa kar

aadmī ḳhud hī jang haarā hai

ham ne ā.īna-e-taḳhayyul meñ

zindagī ko bahut sañvārā hai

ham kahāñ behtarīn tak pahuñche

sāmne jo hai vo hī pyārā hai

but-parastī meñ ham jo māhir haiñ

falsafa kab hameñ gavāra hai

chashm-e-baatin ka ye ishaara hai

hum mein kuchh bhi nahin hamara hai

us ke fazl-o-karam se hai duniya

aur duniya ka har nazara hai

kis se lena hai kis ko hai dena

raqs darwesh ka ishaara hai

yun to KHali hai daman-e-hasti

phir bhi ummid par guzara hai

KHwahishon ke fareb mein aa kar

aadmi KHud hi jang haara hai

hum ne aaina-e-taKHayyul mein

zindagi ko bahut sanwara hai

hum kahan behtarin tak pahunche

samne jo hai wo hi pyara hai

but-parasti mein hum jo mahir hain

falsafa kab hamein gawara hai