چشم باطن کا یہ اشارہ ہے

چشم باطن کا یہ اشارہ ہے

ہم میں کچھ بھی نہیں ہمارا ہے

اس کے فضل و کرم سے ہے دنیا

اور دنیا کا ہر نظارا ہے

کس سے لینا ہے کس کو ہے دینا

رقص درویش کا اشارہ ہے

یوں تو خالی ہے دامن ہستی

پھر بھی امید پر گزارا ہے

خواہشوں کے فریب میں آ کر

آدمی خود ہی جنگ ہارا ہے

ہم نے آئینۂ تخیل میں

زندگی کو بہت سنوارا ہے

ہم کہاں بہترین تک پہنچے

سامنے جو ہے وہ ہی پیارا ہے

بت پرستی میں ہم جو ماہر ہیں

فلسفہ کب ہمیں گوارہ ہے