chashm-e-bina! tere bazar ka mear hain hum

chashm-e-bīnā! tire bāzār kā me.aar haiñ ham

dekh TuuTe hue ḳhvāboñ ke ḳharīdār haiñ ham

kaise tārīḳh farāmosh karegī ham ko

teġh par ḳhuun se likkhā huā inkār haiñ ham

tum jo kahte ho ki baaqī na rahe ahl-e-dil

zaḳhm bechoge chalo becho ḳharīdār haiñ ham

yūñhī lahroñ se kabhī khelne lag jaate haiñ

ek ġharqāb huī naav kī patvār haiñ ham

vo bhī ḳhush hai ki añdhere meñ paḌe rahte haiñ

ham bhī ḳhush haiñ ki ujāle ke taraf-dār haiñ ham

inkisārī ne ajab shaan atā kī ham ko

is qadar ḳham hue lagne lagā talvār haiñ ham

ek muddat se ye manzar nahīñ badlā 'tāriq'

vaqt us paar hai Thahrā huā is paar haiñ ham

chashm-e-bina! tere bazar ka mear hain hum

dekh TuTe hue KHwabon ke KHaridar hain hum

kaise tariKH faramosh karegi hum ko

tegh par KHun se likkha hua inkar hain hum

tum jo kahte ho ki baqi na rahe ahl-e-dil

zaKHm bechoge chalo becho KHaridar hain hum

yunhi lahron se kabhi khelne lag jate hain

ek gharqab hui naw ki patwar hain hum

wo bhi KHush hai ki andhere mein paDe rahte hain

hum bhi KHush hain ki ujale ke taraf-dar hain hum

inkisari ne ajab shan ata ki hum ko

is qadar KHam hue lagne laga talwar hain hum

ek muddat se ye manzar nahin badla 'tariq'

waqt us par hai Thahra hua is par hain hum