chashm-e-dil jis ki rah takti hai

chashm-e-dil jis kī raah taktī hai

ab vo bijlī kahāñ chamaktī hai

der lagtī hai jis ko jalne meñ

aag vo der tak dahaktī hai

tujh se milne kī aas kī chiḌiyā

sehn-e-dil meñ bahut chahaktī hai

dil dahaltā hai dūsrī kā bhī

ek dīvār jab daraktī hai

chhupne vaalī nahīñ mirī chāhat

terī āñkhoñ meñ jo chamaktī hai

tishnagī merī jis se hai mansūb

vo surāhī kahāñ chhalaktī hai

jaane kab vo kareñ vafā dil se

roz chashm-e-vafā phaḌaktī hai

jalne vāloñ se koī kyā pūchhe

kyoñ unheñ raushnī khaTaktī hai

aas TuuTī to saath hī 'rāġhib'

saañs kī Dor TuuT saktī hai

chashm-e-dil jis ki rah takti hai

ab wo bijli kahan chamakti hai

der lagti hai jis ko jalne mein

aag wo der tak dahakti hai

tujh se milne ki aas ki chiDiya

sehn-e-dil mein bahut chahakti hai

dil dahalta hai dusri ka bhi

ek diwar jab darakti hai

chhupne wali nahin meri chahat

teri aankhon mein jo chamakti hai

tishnagi meri jis se hai mansub

wo surahi kahan chhalakti hai

jaane kab wo karen wafa dil se

roz chashm-e-wafa phaDakti hai

jalne walon se koi kya puchhe

kyon unhen raushni khaTakti hai

aas TuTi to sath hi 'raghib'

sans ki Dor TuT sakti hai