chashm-e-dil par kaif hai chhaya hua

chashm-e-dil par kaif hai chhāyā huā

hai tasavvur meñ koī aayā huā

dil meñ hai har vaqt ik mahfil jamī

kyā huā gar maiñ kabhī tanhā huā

tere qābil to nahīñ hai ye magar

ek dil laayā huuñ maiñ TuuTā huā

zikr phir bichhḌe chaman kā chhiḌ gayā

mundamil thā zaḳhm-e-dil taaza huā

ai chaman se aane vaalo kuchh kaho

merā bhī ik āshiyāñ thā kyā huā

ab javānī kā kareñ kyā tazkira

ek afsāna sā hai bhūlā huā

kar rahā hai dil kā mātam kis liye

dil agar TuuTā tirā achchhā huā

umr guzrī aur ham dekhā kiye

zindagī kā kārvāñ luuTā huā

Thokareñ khā khā ke duniyā meñ 'habīb'

yaad aayā har sabaq bhūlā huā

chashm-e-dil par kaif hai chhaya hua

hai tasawwur mein koi aaya hua

dil mein hai har waqt ek mahfil jami

kya hua gar main kabhi tanha hua

tere qabil to nahin hai ye magar

ek dil laya hun main TuTa hua

zikr phir bichhDe chaman ka chhiD gaya

mundamil tha zaKHm-e-dil taza hua

ai chaman se aane walo kuchh kaho

mera bhi ek aashiyan tha kya hua

ab jawani ka karen kya tazkira

ek afsana sa hai bhula hua

kar raha hai dil ka matam kis liye

dil agar TuTa tera achchha hua

umr guzri aur hum dekha kiye

zindagi ka karwan luTa hua

Thokaren kha kha ke duniya mein 'habib'

yaad aaya har sabaq bhula hua