chashm-e-hairan ko tamasha-e-digar par rakkha

chashm-e-hairāñ ko tamāshā-e-digar par rakkhā

aur is dil ko tirī ḳhair-ḳhabar par rakkhā

ain-mumkin hai charāġhoñ ko vo ḳhātir meñ na laa.e

ghar kā ghar ham ne uThā rāhguzar par rakkhā

bojh se jhukne lagī shāḳh to jā kar ham ne

āshiyāne ko kisī aur shajar par rakkhā

chaman-e-dahr meñ is tarah basar kī ham ne

sāya-e-gul kā bhī ehsān na sar par rakkhā

us kī āvāz pe bāhar nikal aayā huuñ 'jamāl'

saarā asbāb-e-safar rah gayā ghar par rakkhā

chashm-e-hairan ko tamasha-e-digar par rakkha

aur is dil ko teri KHair-KHabar par rakkha

ain-mumkin hai charaghon ko wo KHatir mein na lae

ghar ka ghar hum ne uTha rahguzar par rakkha

bojh se jhukne lagi shaKH to ja kar hum ne

aashiyane ko kisi aur shajar par rakkha

chaman-e-dahr mein is tarah basar ki hum ne

saya-e-gul ka bhi ehsan na sar par rakkha

us ki aawaz pe bahar nikal aaya hun 'jamal'

sara asbab-e-safar rah gaya ghar par rakkha