chashm-e-nam karti rahi ashk se fariyaad raqam

chashm-e-nam kartī rahī ashk se fariyād raqam

tab kahīñ jā ke huī dard kī rūdād raqam

terī barsoñ kī kitābat kahīñ barbād na ho

dil-e-nāshād ko ai vaqt na kar shaad raqam

har zamāne meñ qalam kā yahī dastūr rahā

qatl hone pe kiye jaate haiñ a.adād raqam

sū-e-zindāñ kā safar dard ne zanjīr kiyā

ḳhud-ba-ḳhud hotī rahī shorish-e-sayyād raqam

us taraf ḳhāma-e-mahshar ne faqat ek likhā

is taraf chāhe karo jitne bhī afrād raqam

kalma-e-haq ke muqābil jo iram-sāz rahe

un ko tārīḳh kiyā kartī hai shaddād raqam

dil ki ālām-e-haqīqat kā talabgār rahā

so mire haal meñ hotī rahī uftād raqam

soch kar kahnā mire ba.ad koī aisī ġhazal

kahnā paḌ jaa.e na tum ko kahīñ ījād raqam

aise be-dard zamāne haiñ mire saath 'shakīl'

zaḳhm dete haiñ mujhe karke vo ta.adād raqam

chashm-e-nam karti rahi ashk se fariyaad raqam

tab kahin ja ke hui dard ki rudad raqam

teri barson ki kitabat kahin barbaad na ho

dil-e-nashad ko ai waqt na kar shad raqam

har zamane mein qalam ka yahi dastur raha

qatl hone pe kiye jate hain aadad raqam

su-e-zindan ka safar dard ne zanjir kiya

KHud-ba-KHud hoti rahi shorish-e-sayyaad raqam

us taraf KHama-e-mahshar ne faqat ek likha

is taraf chahe karo jitne bhi afrad raqam

kalma-e-haq ke muqabil jo iram-saz rahe

un ko tariKH kiya karti hai shaddad raqam

dil ki aalam-e-haqiqat ka talabgar raha

so mere haal mein hoti rahi uftad raqam

soch kar kahna mere baad koi aisi ghazal

kahna paD jae na tum ko kahin ijad raqam

aise be-dard zamane hain mere sath 'shakil'

zaKHm dete hain mujhe karke wo tadad raqam