chashm-e-nam par muskura kar chal diye

chashm-e-nam par muskurā kar chal diye

aag paanī meñ lagā kar chal diye

saarī mahfil laḌkhaḌātī rah ga.ī

mast āñkhoñ se pilā kar chal diye

gard-e-manzil aaj tak hai be-qarār

ik qayāmat hī uThā kar chal diye

merī ummīdoñ kī duniyā hil ga.ī

naaz se dāman bachā kar chal diye

muḳhtalif andāz se dekhā kiye

sab kī nazreñ aazmā kar chal diye

gulsitāñ meñ aap aa.e bhī to kyā

chand kaliyoñ ko hañsā kar chal diye

vajd meñ aa kar havā.eñ rah ga.iiñ

zer-e-lab kuchh gungunā kar chal diye

vo fazā vo chaudhvīñ kī chāñdnī

husn kī shabnam girā kar chal diye

vo tabassum vo adā.eñ vo nigāh

sab ko dīvāna banā kar chal diye

kuchh ḳhabar un kī bhī hai 'māhir' tumheñ

aap to ġhazleñ sunā kar chal diye

chashm-e-nam par muskura kar chal diye

aag pani mein laga kar chal diye

sari mahfil laDkhaDati rah gai

mast aankhon se pila kar chal diye

gard-e-manzil aaj tak hai be-qarar

ek qayamat hi uTha kar chal diye

meri ummidon ki duniya hil gai

naz se daman bacha kar chal diye

muKHtalif andaz se dekha kiye

sab ki nazren aazma kar chal diye

gulsitan mein aap aae bhi to kya

chand kaliyon ko hansa kar chal diye

wajd mein aa kar hawaen rah gain

zer-e-lab kuchh gunguna kar chal diye

wo faza wo chaudhwin ki chandni

husn ki shabnam gira kar chal diye

wo tabassum wo adaen wo nigah

sab ko diwana bana kar chal diye

kuchh KHabar un ki bhi hai 'mahir' tumhein

aap to ghazlen suna kar chal diye