chashm-e-tar hai koi sarab nahin

chashm-e-tar hai koī sarāb nahīñ

dard-e-dil ab koī azaab nahīñ

kaise is baat par yaqīñ kar luuñ

tū haqīqat hai koī ḳhvāb nahīñ

mausam-e-gul kā zikr rahne de

ye mirī baat kā javāb nahīñ

tū agar ġham se ajnabī hai to

haal apnā bhī ab ḳharāb nahīñ

maan letā huuñ maiñ nahīñ majnūñ

terā ruḳh bhī to māhtāb nahīñ

kyā karūñ husn kā tasavvur ab

tere chehre pe jab naqāb nahīñ

der pahchānñe meñ pal bhar kī

ye koī bā.is-e-iztirāb nahīñ

umr guzrī hai ma.azarat karte

ġhaflateñ merī be-hisāb nahīñ

chashm-e-tar hai koi sarab nahin

dard-e-dil ab koi azab nahin

kaise is baat par yaqin kar lun

tu haqiqat hai koi KHwab nahin

mausam-e-gul ka zikr rahne de

ye meri baat ka jawab nahin

tu agar gham se ajnabi hai to

haal apna bhi ab KHarab nahin

man leta hun main nahin majnun

tera ruKH bhi to mahtab nahin

kya karun husn ka tasawwur ab

tere chehre pe jab naqab nahin

der pahchanne mein pal bhar ki

ye koi bais-e-iztirab nahin

umr guzri hai mazarat karte

ghaflaten meri be-hisab nahin