chashm-e-tar pe naqsh hai un manzaron ka silsila

chashm-e-tar pe naqsh hai un manzaroñ kā silsila

baḌhte baḌhte baḌh gayā hai fāsloñ kā silsila

ham salāmat kis tarah rahte bhalā sach bol kar

chār-sū bikhrā paḌā thā pattharoñ kā silsila

dil kī vahshat māñgtī hai lā-makāñ kī vus.ateñ

ik nazar bhātā nahīñ mujh ko gharoñ kā silsila

niiñd kā ehsās raushan qumqumoñ meñ kho gayā

aa basā āñkhoñ meñ mere ratjagoñ kā silsila

vo anā ke ḳhol meñ thā maiñ anā se duur thī

mere us ke darmiyāñ thā uljhanoñ kā silsila

kyoñ nazar aatī nahīñ logoñ ko apnī sūrateñ

duur tak phailā hai jabki ā.inoñ kā silsila

'yāsmīñ' jin se mayassar ho tarāvat aañkh ko

dekhnā hai ab mujhe aisī rutoñ kā silsila

chashm-e-tar pe naqsh hai un manzaron ka silsila

baDhte baDhte baDh gaya hai faslon ka silsila

hum salamat kis tarah rahte bhala sach bol kar

chaar-su bikhra paDa tha pattharon ka silsila

dil ki wahshat mangti hai la-makan ki wusaten

ek nazar bhata nahin mujh ko gharon ka silsila

nind ka ehsas raushan qumqumon mein kho gaya

aa basa aankhon mein mere ratjagon ka silsila

wo ana ke KHol mein tha main ana se dur thi

mere us ke darmiyan tha uljhanon ka silsila

kyon nazar aati nahin logon ko apni suraten

dur tak phaila hai jabki aainon ka silsila

'yasmin' jin se mayassar ho tarawat aankh ko

dekhna hai ab mujhe aisi ruton ka silsila