chashm ko saunpi gai KHidmat-e-KHwab

chashm ko sauñpī ga.ī ḳhidmat-e-ḳhvāb

dil pe taarī hai ajab hālat-e-ḳhvāb

ḳhvāb ab ke na haqīqat ho jaa.e

ab ke aisī hai mirī shiddat-e-ḳhvāb

maiñ ne paḌh lī haiñ tirī bhī āñkheñ

sirf mujh par na lagā tohmat-e-ḳhvāb

tujh ko muzhda ho mirī aañkh ki ab

mujh meñ baaqī na rahī himmat-e-ḳhvāb

ḳhvāb maḳhfī hī rahe sab se yahāñ

kaun kartā hai bhalā izzat-e-ḳhvāb

merī āñkhoñ meñ guhar haiñ kitne

mujh ko hāsil hai bahut daulat-e-ḳhvāb

tum ki jalvat se gurezāñ ho bahut

ab to aa jaao ki hai ḳhalvat-e-ḳhvāb

us ke pahre haiñ mirī āñkhoñ par

us ko ma.alūm hai kyā quvvat-e-ḳhvāb

kitnā be-ḳhvāb kiyā hai tū ne

chhoḌ pīchhā mirā ai āfat-e-ḳhvāb

bas kaleja hī chabā jaatī hai

kitnī ḳhuñḳhār hai ye vahshat-e-ḳhvāb

kā.enāt aur hayāt ai 'ḳhālid'

ḳhvāb meñ jaise koī sā.at-e-ḳhvāb

chashm ko saunpi gai KHidmat-e-KHwab

dil pe tari hai ajab haalat-e-KHwab

KHwab ab ke na haqiqat ho jae

ab ke aisi hai meri shiddat-e-KHwab

main ne paDh li hain teri bhi aankhen

sirf mujh par na laga tohmat-e-KHwab

tujh ko muzhda ho meri aankh ki ab

mujh mein baqi na rahi himmat-e-KHwab

KHwab maKHfi hi rahe sab se yahan

kaun karta hai bhala izzat-e-KHwab

meri aankhon mein guhar hain kitne

mujh ko hasil hai bahut daulat-e-KHwab

tum ki jalwat se gurezan ho bahut

ab to aa jao ki hai KHalwat-e-KHwab

us ke pahre hain meri aankhon par

us ko malum hai kya quwwat-e-KHwab

kitna be-KHwab kiya hai tu ne

chhoD pichha mera ai aafat-e-KHwab

bas kaleja hi chaba jati hai

kitni KHunKHar hai ye wahshat-e-KHwab

kaenat aur hayat ai 'KHalid'

KHwab mein jaise koi saat-e-KHwab