chashm mein kab ashk bhar late hain hum

chashm meñ kab ashk bhar laate haiñ ham

raat din motī hī barsāte haiñ ham

jabki vo tīr-e-nigah khāte haiñ ham

sahm kar bas sard ho jaate haiñ ham

jins-e-dil ko chhoḌ mat ai zulf-e-yār

hai ye saudā muft Thahrāte haiñ ham

nāsehā dast-e-junūñ se kaam hai

kab ye chāk-e-jeb silvāte haiñ ham

is qadar mat kar sharārat sho.ala-ḳhez

terī in bātoñ se jal jaate haiñ ham

kaun kahtā hai na kiije imtihāñ

gar abhī kahiye to mar jaate haiñ ham

ḳhat but-e-nau-ḳhat likhe hai ġhair ko

pech-o-tāb is vāste khāte haiñ ham

kholiye kyā aañkh mānind-e-habāb

turfat-ul-ain aah miT jaate haiñ ham

chheḌne se zulf ke uljho na tum

paḌ gayā hai pech suljhāte haiñ ham

garche haiñ darvesh lekin ai falak

tujh ko ḳhātir meñ nahīñ laate haiñ ham

niim naañ ke vāste kab juuñ hilāl

tere aage haath phailāte haiñ ham

gulshan-e-duniyā hai nairañgī ke saath

aur kuchh us kī ravish paate haiñ ham

kab ba-rañg-e-bū-e-gul bāhar sabā

apne jaame se nikal jaate haiñ ham

jis qadar haañ dekhte haiñ oḌhnā

paañv yaañ utne hī phailāte haiñ ham

kyā kareñ kis se kaheñ nā-chār haiñ

dil kī be-tābī se ghabrāte haiñ ham

koī bhī itnā nahīñ kahtā 'nasīr'

sabr kar zālim use laate haiñ ham

chashm mein kab ashk bhar late hain hum

raat din moti hi barsate hain hum

jabki wo tir-e-nigah khate hain hum

sahm kar bas sard ho jate hain hum

jins-e-dil ko chhoD mat ai zulf-e-yar

hai ye sauda muft Thahraate hain hum

naseha dast-e-junun se kaam hai

kab ye chaak-e-jeb silwate hain hum

is qadar mat kar shararat shoala-KHez

teri in baaton se jal jate hain hum

kaun kahta hai na kije imtihan

gar abhi kahiye to mar jate hain hum

KHat but-e-nau-KHat likhe hai ghair ko

pech-o-tab is waste khate hain hum

kholiye kya aankh manind-e-habab

turfat-ul-ain aah miT jate hain hum

chheDne se zulf ke uljho na tum

paD gaya hai pech suljhate hain hum

garche hain darwesh lekin ai falak

tujh ko KHatir mein nahin late hain hum

nim nan ke waste kab jun hilal

tere aage hath phailate hain hum

gulshan-e-duniya hai nairangi ke sath

aur kuchh us ki rawish pate hain hum

kab ba-rang-e-bu-e-gul bahar saba

apne jame se nikal jate hain hum

jis qadar han dekhte hain oDhna

panw yan utne hi phailate hain hum

kya karen kis se kahen na-chaar hain

dil ki be-tabi se ghabraate hain hum

koi bhi itna nahin kahta 'nasir'

sabr kar zalim use late hain hum