chaTak ke ghunche sunate hain kis ka afsana

chaTak ke ġhunche sunāte haiñ kis kā afsāna

ye kaun aa gayā gulshan meñ be-hijābāna

hamārā hausla-e-dil agar salāmat hai

badal hī deñge kisī din nizām-e-mai-ḳhāna

na hosh aa.egā us ko tire karam ke baġhair

tirī talāsh meñ jo ho gayā hai dīvāna

yahī hai maslahat-e-vaqt sab ko Thukrā duuñ

mujhe samajhtī hai duniyā to samjhe dīvāna

kisī ke husn kī tābāniyoñ kā kyā kahnā

nigāheñ ho ga.iiñ qurbān misl-e-dīvāna

vahīñ maiñ josh-e-haqīqat meñ sar jhukā dūñgā

jahāñ milegā mujhe naqsh-e-pā-e-jānāna

nasīhat aap kī hai to bajā magar nāseh

vo kyā kare ki hai jis kā mizāj rindāna

vo jab se mere tasavvur meñ aa.e haiñ 'kashfī'

banā huā hai tajallī-kada ye kāshāna

chaTak ke ghunche sunate hain kis ka afsana

ye kaun aa gaya gulshan mein be-hijabana

hamara hausla-e-dil agar salamat hai

badal hi denge kisi din nizam-e-mai-KHana

na hosh aaega us ko tere karam ke baghair

teri talash mein jo ho gaya hai diwana

yahi hai maslahat-e-waqt sab ko Thukra dun

mujhe samajhti hai duniya to samjhe diwana

kisi ke husn ki tabaniyon ka kya kahna

nigahen ho gain qurban misl-e-diwana

wahin main josh-e-haqiqat mein sar jhuka dunga

jahan milega mujhe naqsh-e-pa-e-jaanana

nasihat aap ki hai to baja magar naseh

wo kya kare ki hai jis ka mizaj rindana

wo jab se mere tasawwur mein aae hain 'kashfi'

bana hua hai tajalli-kada ye kashana