chaukhaT pe ki raste pe rakho meri bala se

chaukhaT pe ki raste pe rakho merī balā se

merā vo diyā hai nahīñ Dartā jo havā se

ye jurm-e-mohabbat maiñ ne dānista kiyā hai

duniyā se kaho mujh ko Darā.e na sazā se

ye mere sitamgar kā karam kam to nahīñ hai

maiñ aah jo bhartā huuñ to detā hai dilāse

is shahr meñ baste haiñ jo bahre haiñ ki murde

ab dar nahīñ khultā hai koī āh-o-bukā se

kuchh logoñ ne mil-jul ke kuaañ khod liyā hai

kuchh log abhī minnateñ karte haiñ ghaTā se

dariyā kī saḳhāvat kā bharam khulne lagā hai

kuchh log haiñ sairāb to kuchh log haiñ pyāse

bīmār ne is baar yahī qasd kiyā hai

vo Thiik nahīñ hogā davā se na du'ā se

chaukhaT pe ki raste pe rakho meri bala se

mera wo diya hai nahin Darta jo hawa se

ye jurm-e-mohabbat main ne danista kiya hai

duniya se kaho mujh ko Darae na saza se

ye mere sitamgar ka karam kam to nahin hai

main aah jo bharta hun to deta hai dilase

is shahr mein baste hain jo bahre hain ki murde

ab dar nahin khulta hai koi aah-o-buka se

kuchh logon ne mil-jul ke kuan khod liya hai

kuchh log abhi minnaten karte hain ghaTa se

dariya ki saKHawat ka bharam khulne laga hai

kuchh log hain sairab to kuchh log hain pyase

bimar ne is bar yahi qasd kiya hai

wo Thik nahin hoga dawa se na du'a se