چونک چونک اٹھتا ہوں اے باد صبا رات گئے

چونک چونک اٹھتا ہوں اے باد صبا رات گئے

کون دیتا ہے در دل پہ صدا رات گئے

آرزوؤں کے مسلسل کئی بادل برسے

مرے شانے پہ وہ لہرائی گھٹا رات گئے

میرے ہی سینے میں چہرے کو چھپا کر اس نے

دی مری شوخ نگاہی کی سزا رات گئے

دل میں اب تک ہے شفق رنگ خیالوں کا ہجوم

اس کے عارض پہ تھا وہ رنگ حیا رات گئے

اس کے اعجاز تلطف کی تڑپ کیا کہئے

کوئی احساس کا پہلو نہ بچا رات گئے

ہائے یہ رمز سخن آہ یہ انداز فراق

کسمسا اور مری فکر ذرا رات گئے

تھا مرے ہاتھ میں وہ دست حنائی مطربؔ

تھے در دل پہ بھی کچھ نقش حنا رات گئے