chaunk uThe aql wale ye kya kah diya

chauñk uThe aql vaale ye kyā kah diyā

husn ko maiñ ne apnā ḳhudā kah diyā

nūr-e-dil se hai raushan jahān-e-vafā

dil ko maiñ ne charāġh-e-vafā kah diyā

phuul muskā.e kaliyoñ ne añgḌā.ī lī

ai nasīm-e-sahar tū ne kyā kah diyā

maiñ ne dil meñ koī baat rakkhī nahīñ

maiñ ne har baat ko barmalā kah diyā

merī rūdād-e-ġham khā ga.ī hai mujhe

sunñe vāloñ ne to vāh-vā kah diyā

log le jā.eñge sū-e-dār-o-rasan

ham ne dil kā agar mudda.ā kah diyā

apnā sheva rahā 'rāje' kyā sādgī

ham ne un kī jafā ko vafā kah diyā

chaunk uThe aql wale ye kya kah diya

husn ko main ne apna KHuda kah diya

nur-e-dil se hai raushan jahan-e-wafa

dil ko main ne charagh-e-wafa kah diya

phul muskae kaliyon ne angDai li

ai nasim-e-sahar tu ne kya kah diya

main ne dil mein koi baat rakkhi nahin

main ne har baat ko barmala kah diya

meri rudad-e-gham kha gai hai mujhe

sunne walon ne to wah-wa kah diya

log le jaenge su-e-dar-o-rasan

hum ne dil ka agar muddaa kah diya

apna shewa raha 'raje' kya sadgi

hum ne un ki jafa ko wafa kah diya