چہرہ حسین کھردرے پتھر میں قید ہے

چہرہ حسین کھردرے پتھر میں قید ہے

عکس نشاط کرب کے منظر میں قید ہے

کوئی نہ سن سکے گا یہ معلوم ہے مجھے

آواز میری گنبد بے در میں قید ہے

مجھ کو تری تلاش ہے کب سے یزید وقت

آب حیات تیرے ہی خنجر میں قید ہے

مجھ کو سجھائی دیتا نہیں اپنا ہاتھ بھی

میری نظر دھوئیں کے سمندر میں قید ہے

پنچھی جو آسمان میں اڑتا تھا رات دن

نرغے میں فائلوں کے وہ دفتر میں قید ہے

اب صرف اپنا جسم لیے گھومتا ہوں میں

اے نجمؔ میری روح مرے گھر میں قید ہے