chehra salim na nazar hi qaem

chehra sālim na nazar hī qaa.em

be-sutūñ sab kī havelī qaa.em

haath se maujoñ ne rakh dī patvār

kaise dhāre pe hai kashtī qaa.em

ziist hai kachche ghaḌe ke mānind

bahte paanī pe hai miTTī qaa.em

saa.e dīvār ke TeḌhe tirchhe

aur dīvār ki sīdhī qaa.em

sab haiñ TuuTī huī qadroñ ke khañDar

kaun hai vaz' pe apnī qaa.em

ḳhud ko kis sat.h pe zinda rakkhūñ

lafz daa.im haiñ na mā'nī qaa.em

hai baḌī baat jo rah jaa.e 'fazā'

sat.h-e-sanjīda-nigāhī qaa.em

chehra salim na nazar hi qaem

be-sutun sab ki haweli qaem

hath se maujon ne rakh di patwar

kaise dhaare pe hai kashti qaem

zist hai kachche ghaDe ke manind

bahte pani pe hai miTTi qaem

sae diwar ke TeDhe tirchhe

aur diwar ki sidhi qaem

sab hain TuTi hui qadron ke khanDar

kaun hai waz' pe apni qaem

KHud ko kis sath pe zinda rakkhun

lafz daim hain na ma'ni qaem

hai baDi baat jo rah jae 'faza'

sath-e-sanjida-nigahi qaem