چہرہ سبب بغیر نہیں میرا زرد ہے

چہرہ سبب بغیر نہیں میرا زرد ہے

دل پر لگی ہے چوٹ کلیجے میں درد ہے

گزرا ہے اس طرف سے کوئی کارواں ضرور

منزل کی سمت جب تو ہواؤں میں گرد ہے

پھر حشر ہو نہ جائے بپا کائنات میں

بیمار غم کے ہونٹوں پہ اک آہ سرد ہے

وہ راہ حق میں موت سے ڈرتا نہیں کبھی

جو عالم حیات کا جاں باز مرد ہے

للہ دو گھڑی کے لئے دیکھ بھی تو جا

تیرے مریض عشق کی اب نبض سرد ہے

اخترؔ بتا جنون محبت ہے کیا بلا

کہتے ہیں آج کل کہ تو صحرا نورد ہے