chehra sabab baghair nahin mera zard hai

chehra sabab baġhair nahīñ merā zard hai

dil par lagī hai choT kaleje meñ dard hai

guzrā hai is taraf se koī kārvāñ zarūr

manzil kī samt jab to havāoñ meñ gard hai

phir hashr ho na jaa.e bapā kā.enāt meñ

bīmār-e-ġham ke hoñToñ pe ik āh-e-sard hai

vo rāh-e-haq meñ maut se Dartā nahīñ kabhī

jo ālam-e-hayāt kā jāñ-bāz mard hai

lillāh do-ghaḌī ke liye dekh bhī to jā

tere marīz-e-ishq kī ab nabz sard hai

'aḳhtar' batā junūn-e-mohabbat hai kyā balā

kahte haiñ āj-kal ki tū sahrā-navard hai

chehra sabab baghair nahin mera zard hai

dil par lagi hai choT kaleje mein dard hai

guzra hai is taraf se koi karwan zarur

manzil ki samt jab to hawaon mein gard hai

phir hashr ho na jae bapa kaenat mein

bimar-e-gham ke honTon pe ek aah-e-sard hai

wo rah-e-haq mein maut se Darta nahin kabhi

jo aalam-e-hayat ka jaan-baz mard hai

lillah do-ghaDi ke liye dekh bhi to ja

tere mariz-e-ishq ki ab nabz sard hai

'aKHtar' bata junun-e-mohabbat hai kya bala

kahte hain aaj-kal ki tu sahra-naward hai