chehre mein kashish hai mah-o-anjum se ziyaada

chehre meñ kashish hai mah-o-anjum se ziyāda

mahfil meñ hasīñ koī nahīñ tum se ziyāda

maqtal meñ tire husn ke ye scene 'ajab thā

ḳhanjar se mare kam haiñ tabassum se ziyāda

sau baat kī ik baat buzurgoñ ne batā.ī

hai lutf ḳhamoshī meñ takallum se ziyāda

maujoñ kā koī ḳhauf na tūfāñ kā koī Dar

mājhī se maiñ Dartā huuñ talātum se ziyāda

mashkūk nigāhoñ se na dekhā karo us ko

ash'ār vo kahtā hai miyāñ tum se ziyāda

jab aa ga.e mahfil meñ suḳhan-fahm suḳhan-sāz

she'roñ pe milī daad tarannum se ziyāda

taqrīr vo kartā hai baḌe josh meñ lekin

jo shaḳhs paḌhā hī nahīñ panjum se ziyāda

is daur-e-tijārat kā 'ajab haal hai 'fārūq'

sikkoñ meñ tavānā.ī hai gandum se ziyāda

chehre mein kashish hai mah-o-anjum se ziyaada

mahfil mein hasin koi nahin tum se ziyaada

maqtal mein tere husn ke ye scene 'ajab tha

KHanjar se mare kam hain tabassum se ziyaada

sau baat ki ek baat buzurgon ne batai

hai lutf KHamoshi mein takallum se ziyaada

maujon ka koi KHauf na tufan ka koi Dar

majhi se main Darta hun talatum se ziyaada

mashkuk nigahon se na dekha karo us ko

ash'ar wo kahta hai miyan tum se ziyaada

jab aa gae mahfil mein suKHan-fahm suKHan-saz

she'ron pe mili dad tarannum se ziyaada

taqrir wo karta hai baDe josh mein lekin

jo shaKHs paDha hi nahin panjum se ziyaada

is daur-e-tijarat ka 'ajab haal hai 'faruq'

sikkon mein tawanai hai gandum se ziyaada