چہرے پہ حزن و رنج و الم کے نشاں نہ تھے

چہرے پہ حزن و رنج و الم کے نشاں نہ تھے

ہم رو رہے تھے آنکھ سے آنسو رواں نہ تھے

ہر بات پہ ہم آپ کی خاموش ہی رہے

پاس ادب تھا ورنہ تو ہم بے زباں نہ تھے

پہلے بھی کچھ ہوئیں تھیں غلط فہمیاں مگر

اس طرح لوگ ہم سے کبھی بد گماں نہ تھے

باتوں سے ہم تو دنیا کو دھوکہ نہ دے سکے

سیدھی سی بات کہتے تھے جادو بیاں نہ تھے

یک بارگی یہ لطف و کرم ہو رہا ہے کیوں

اس طرح آپ ہم پہ کبھی مہرباں نہ تھے

مشکل سے ہم نے منزل مقصود پائی ہے

بیٹھے ہماری تاک میں دشمن کہاں نہ تھے