chehre pe mere rang pareshaniyon ka hai

chehre pe mere rañg pareshāniyoñ kā hai

dariyā meñ saarā zor hī tuġhyāniyoñ kā hai

ḳhud rahbarān-e-qaum haiñ ālā.ishoñ meñ gum

ham se magar mutāliba qurbāniyoñ kā hai

ahbāb mere is tarah mujh par haiñ ta.ana-zan

jaise ḳhulūs naam hī nādāniyoñ kā hai

sāhil jo kaT ke girte haiñ dariyā kī god meñ

kyā ye qusūr bahte hue pāniyoñ kā hai

insāñ nahīñ hai koī bhī saa.e zarūr haiñ

manzar har ek shahr meñ vīrāniyoñ kā hai

kuchh ḳhauf-e-ehtisāb na suud o ziyāñ kā Dar

ye fā.eda to be-sar-o-sāmāniyoñ kā hai

chehre pe mere rang pareshaniyon ka hai

dariya mein sara zor hi tughyaniyon ka hai

KHud rahbaran-e-qaum hain aalaishon mein gum

hum se magar mutaliba qurbaniyon ka hai

ahbab mere is tarah mujh par hain tana-zan

jaise KHulus nam hi nadaniyon ka hai

sahil jo kaT ke girte hain dariya ki god mein

kya ye qusur bahte hue paniyon ka hai

insan nahin hai koi bhi sae zarur hain

manzar har ek shahr mein viraniyon ka hai

kuchh KHauf-e-ehtisab na sud o ziyan ka Dar

ye faeda to be-sar-o-samaniyon ka hai