chehre pe sare shahr ke gard-e-malal hai

chehre pe saare shahr ke gard-e-malāl hai

jo dil kā haal hai vahī dillī kā haal hai

uljhan ghuTan hirās tapish karb intishār

vo bhiiḌ hai ke saañs bhī lenā muhāl hai

āvārgī kā haq hai havāoñ ko shahr meñ

ghar se charāġh le ke nikalnā muhāl hai

be-chehragī kī bhiiḌ meñ gum hai har ik vajūd

ā.īna pūchhtā hai kahāñ ḳhadd-o-ḳhāl hai

jin meñ ye vasf ho ki chhupā leñ har ek daaġh

un ā.inoñ kī aaj baḌī dekh-bhāl hai

parchhā.iyāñ qadoñ se bhī aage nikal ga.iiñ

sūraj ke Duub jaane kā ab ehtimāl hai

kashkol-e-chashm le ke phiro tum na dar-ba-dar

'manzūr' qaht-e-jins-e-vafā kā ye saal hai

chehre pe sare shahr ke gard-e-malal hai

jo dil ka haal hai wahi dilli ka haal hai

uljhan ghuTan hiras tapish karb intishaar

wo bhiD hai ke sans bhi lena muhaal hai

aawargi ka haq hai hawaon ko shahr mein

ghar se charagh le ke nikalna muhaal hai

be-chehragi ki bhiD mein gum hai har ek wajud

aaina puchhta hai kahan KHadd-o-KHal hai

jin mein ye wasf ho ki chhupa len har ek dagh

un aainon ki aaj baDi dekh-bhaal hai

parchhaiyan qadon se bhi aage nikal gain

suraj ke Dub jaane ka ab ehtimal hai

kashkol-e-chashm le ke phiro tum na dar-ba-dar

'manzur' qaht-e-jins-e-wafa ka ye sal hai