chehron pe khuli dhup saja kar jo gaya hai

chehroñ pe khulī dhuup sajā kar jo gayā hai

ab shahr meñ sūraj bhī use DhūñD rahā hai

maiñ ḳhush huuñ bahut kāñch kī poshāk pahan kar

patthar se jo Takrā.ī hai vo merī sadā hai

vo shaḳhs jo ā.īna thā chehroñ ke jahāñ meñ

bikhrā to kisī se bhī sameTā na gayā hai

ghar us kā hai darvāza bhī dastak bhī usī kī

āvāz ke rishtoñ meñ vahī shahr-e-duā hai

haath us kā har ik soch mirī thaam rahā hai

vo shaḳhs mirī zaat meñ mujh se bhī baḌā hai

ik abr kā TukḌā jo tirī yaad kā guzrā

ehsās kā sūkhā huā jangal bhī harā hai

shīshe kā koī ghar thā na dil kī koī āvāz

phir kyoñ ye sar-e-rāh chhanākā sā huā hai

chehron pe khuli dhup saja kar jo gaya hai

ab shahr mein suraj bhi use DhunD raha hai

main KHush hun bahut kanch ki poshak pahan kar

patthar se jo Takrai hai wo meri sada hai

wo shaKHs jo aaina tha chehron ke jahan mein

bikhra to kisi se bhi sameTa na gaya hai

ghar us ka hai darwaza bhi dastak bhi usi ki

aawaz ke rishton mein wahi shahr-e-dua hai

hath us ka har ek soch meri tham raha hai

wo shaKHs meri zat mein mujh se bhi baDa hai

ek abr ka TukDa jo teri yaad ka guzra

ehsas ka sukha hua jangal bhi hara hai

shishe ka koi ghar tha na dil ki koi aawaz

phir kyon ye sar-e-rah chhanaka sa hua hai