chehron pe likkhe logon ke sadme paDha karo

chehroñ pe likkhe logoñ ke sadme paḌhā karo

qabroñ pe likkhe mardoñ ke katbe paḌhā karo

rakhte haiñ kyā vo bastoñ meñ baste paḌhā karo

likhte haiñ kyā vo parchoñ meñ parche paḌhā karo

mālūm to ho miTTī ki daldal thī paañv meñ

jo ho sake to būToñ ke tasme paḌhā karo

dukh dene kā jo socho kisī bhī aziiz ko

to phir qarīb se sabhī rishte paḌhā karo

ye na suno ki kyā kyā vo kahte rahe tumheñ

jo ho sake to logoñ ke lahje paḌhā karo

chaḌhte haiñ log phāñsī pe kis jurm ke tahat

taḳhtī to paḌh hī lete ho taḳhte paḌhā karo

jab baazī hārne lago to ġhaur se zarā

shatranj pe bichhe hue mohre paḌhā karo

socho kabhī talāq kā to is se beshtar

shādī pe likhe beToñ ke sehre paḌhā karo

āñkheñ paḌho ki in meñ ye paanī hai kis liye

maiñ ne ye kab kahā hai ki chehre paḌhā karo

chehron pe likkhe logon ke sadme paDha karo

qabron pe likkhe mardon ke katbe paDha karo

rakhte hain kya wo baston mein baste paDha karo

likhte hain kya wo parchon mein parche paDha karo

malum to ho miTTi ki daldal thi panw mein

jo ho sake to buTon ke tasme paDha karo

dukh dene ka jo socho kisi bhi aziz ko

to phir qarib se sabhi rishte paDha karo

ye na suno ki kya kya wo kahte rahe tumhein

jo ho sake to logon ke lahje paDha karo

chaDhte hain log phansi pe kis jurm ke tahat

taKHti to paDh hi lete ho taKHte paDha karo

jab bazi haarne lago to ghaur se zara

shatranj pe bichhe hue mohre paDha karo

socho kabhi talaq ka to is se beshtar

shadi pe likhe beTon ke sehre paDha karo

aankhen paDho ki in mein ye pani hai kis liye

main ne ye kab kaha hai ki chehre paDha karo