chehron pe zar-posh andhere phaile hain

chehroñ pe zar-posh andhere phaile haiñ

ab jiine ke Dhañg baḌe hī mahñge haiñ

hāthoñ meñ sūraj le kar kyuuñ phirte haiñ

is bastī meñ ab dīda-var kitne haiñ

qadroñ kī shab-rezī par hairānī kyuuñ

zehnoñ meñ ab kaale sūraj palte haiñ

har bhare jañgal kaT kar ab shahr hue

banjāre kī āñkhoñ meñ sannāTe haiñ

phūloñ vaale Taapū to ġharqāb hue

aag agle na.e jazīre ubhre haiñ

us ke bosīda-kapḌoñ par mat jaao

mast qalandar kī jholī meñ hiire haiñ

zikr karo ho mujh se kyā tuġhyānī kā

sāhil par hī apne rain basere haiñ

is vaadī kā to dastūr nirālā hai

phuul saroñ par kañkar patthar Dhote haiñ

'amabar' laakh savā pañkhī mausam aa.eñ

oloñ kī zad meñ anmol parinde haiñ

chehron pe zar-posh andhere phaile hain

ab jine ke Dhang baDe hi mahnge hain

hathon mein suraj le kar kyun phirte hain

is basti mein ab dida-war kitne hain

qadron ki shab-rezi par hairani kyun

zehnon mein ab kale suraj palte hain

har bhare jangal kaT kar ab shahr hue

banjare ki aankhon mein sannaTe hain

phulon wale Tapu to gharqab hue

aag agle nae jazire ubhre hain

us ke bosida-kapDon par mat jao

mast qalandar ki jholi mein hire hain

zikr karo ho mujh se kya tughyani ka

sahil par hi apne rain basere hain

is wadi ka to dastur nirala hai

phul saron par kankar patthar Dhote hain

'amabar' lakh sawa pankhi mausam aaen

olon ki zad mein anmol parinde hain