chha gai soch ki ek be-kal ghaTa

chhā ga.ī soch kī ek be-kal ghaTā

dekh mausam ye shāyad hai barsāt kā

koī nazreñ bachā kar gayā paas se

koī nazreñ churā kar rahā dekhtā

raqs meñ thī ḳhayāloñ kī ik anjuman

jhanjhanāne lagī shoḳh dilkash fazā

gungunāne lagī husn kī be-ruḳhī

jab kisī kī vafāoñ kā charchā huā

raqs kartī rahīñ shoḳh tanhā.iyāñ

yaad kā ek mausam suhānā lagā

thā javāboñ talak ek lambā safar

ajnabī se savāloñ ne uljhā diyā

bīt.te mausamoñ kī adā.eñ liye

hādisa ek dil par guzartā gayā

phir na guzrī kabhī chain se zindagī

terī bechain nazroñ ne kyā kah diyā

chha gai soch ki ek be-kal ghaTa

dekh mausam ye shayad hai barsat ka

koi nazren bacha kar gaya pas se

koi nazren chura kar raha dekhta

raqs mein thi KHayalon ki ek anjuman

jhanjhanane lagi shoKH dilkash faza

gungunane lagi husn ki be-ruKHi

jab kisi ki wafaon ka charcha hua

raqs karti rahin shoKH tanhaiyan

yaad ka ek mausam suhana laga

tha jawabon talak ek lamba safar

ajnabi se sawalon ne uljha diya

bitte mausamon ki adaen liye

hadisa ek dil par guzarta gaya

phir na guzri kabhi chain se zindagi

teri bechain nazron ne kya kah diya