chhanw piti hai dhup khati hai

chhāñv piitī hai dhuup khātī hai

shab sadā kī chuḌail jaatī hai

ik sitāre pe aan baiThe haiñ

haath meñ chāñd kī chapātī hai

aur kuchh ho na ho zamāne meñ

ek daa.im sī be-sabātī hai

mere dukh-dard go zamīnī haiñ

merī tanhā.ī kā.enātī hai

jhiil ko tairnā nahīñ aatā

apne paanī meñ Duub jaatī hai

dekh kar ghar kī hālat-e-ḳhasta

merī tasvīr muskurātī hai

ek nalkī mahīn dhāge kī

dast-e-ḳhayyāt ko ghumātī hai

jīne-marne se baaz aate nahīñ

apnī fitrat hī vārdātī hai

zindagī kitnī achchhī teacher hai

zindagī bhar sabaq sikhātī hai

ab parindoñ ko kaun samjhā.e

shāḳh-e-chhitnār kaT bhī jaatī hai

chalne lagtā hai rāsta mujh meñ

merī bachchī qadam uThātī hai

ab to hone se kuchh nahīñ hotā

ab to honā bhī nafsiyātī hai

dast-e-tārīḳh se nikalte hī

jang zehnoñ meñ phail jaatī hai

aate aate bhī shā.irī 'nāsir'

ik zamāne ke ba.ad aatī hai

chhanw piti hai dhup khati hai

shab sada ki chuDail jati hai

ek sitare pe aan baiThe hain

hath mein chand ki chapati hai

aur kuchh ho na ho zamane mein

ek daim si be-sabaati hai

mere dukh-dard go zamini hain

meri tanhai kaenati hai

jhil ko tairna nahin aata

apne pani mein Dub jati hai

dekh kar ghar ki haalat-e-KHasta

meri taswir muskuraati hai

ek nalki mahin dhage ki

dast-e-KHayyat ko ghumati hai

jine-marne se baz aate nahin

apni fitrat hi wardati hai

zindagi kitni achchhi teacher hai

zindagi bhar sabaq sikhati hai

ab parindon ko kaun samjhae

shaKH-e-chhitnar kaT bhi jati hai

chalne lagta hai rasta mujh mein

meri bachchi qadam uThati hai

ab to hone se kuchh nahin hota

ab to hona bhi nafsiyati hai

dast-e-tariKH se nikalte hi

jang zehnon mein phail jati hai

aate aate bhi shairi 'nasir'

ek zamane ke baad aati hai