chhalawa ho pari ho hur ho mahshar-laqa tum ho

chhalāvā ho parī ho huur ho mahshar-laqā tum ho

samajh meñ kuchh nahīñ aatā ḳhudā jaane ki kyā tum ho

sarāpā naaz ho rashk-e-parī ho mah-laqā tum ho

faroġh-e-rū-e-'ālam ho tajallī ho ziyā tum ho

kahīñ ho tāzgī-e-gul kahīñ bād-e-sabā tum ho

mirī jaañ gulshan-e-husn-o-javānī kī fazā tum ho

sarāpā ġhamza-o-shoḳhī-o-andāz-o-adā tum ho

kabhī teġh-e-do-paikar ho kabhī tīr-e-qazā tum ho

khiche abrū chaḌhī chitvan ġhazab badle hue tevar

ba-shakl-e-ḳhanjar-e-ḳhūñ-ḳhvār 'āshiq kī qazā tum ho

dam-e-raftār saa.e se bhī apne bach ke chalte ho

uḌā rakkhā hai shoḳhī ne ki pāband-e-hayā tum ho

sañbhālo hosh Thero phir uThānā haath meñ ḳhanjar

laḌakpan hai bahut kamsin abhī nām-e-ḳhudā tum ho

phañse ho kis ġhazab meñ hazrat-e-dil kyā qayāmat hai

asīr-e-zulf-e-pechāñ ho giraftār-e-balā tum ho

hamāre dil meñ tum aur ham tumhāre dil meñ rahte haiñ

na kuchh tum se judā ham haiñ na kuchh ham se judā tum ho

nikal kar ab kahāñ jāoge dil se aarzū ho kar

mirī hasrat mirā armān merā mudda'ā tum ho

mukar jaate ho dil le kar zarā ġhairat nahīñ aatī

baḌe dam-bāz ho jhūTe ho matlab-āshnā tum ho

sunā jab zikr chāhat kā to yuuñ andām se bole

yahī sūrat hai mere chāhne vāloñ meñ kyā tum ho

tumhārā hī tumhārā har rag-o-resha meñ jalva hai

nazar meñ jaan meñ āñkhoñ meñ dil meñ jā-ba-jā tum ho

chhalawa ho pari ho hur ho mahshar-laqa tum ho

samajh mein kuchh nahin aata KHuda jaane ki kya tum ho

sarapa naz ho rashk-e-pari ho mah-laqa tum ho

farogh-e-ru-e-'alam ho tajalli ho ziya tum ho

kahin ho tazgi-e-gul kahin baad-e-saba tum ho

meri jaan gulshan-e-husn-o-jawani ki faza tum ho

sarapa ghamza-o-shoKHi-o-andaz-o-ada tum ho

kabhi tegh-e-do-paikar ho kabhi tir-e-qaza tum ho

khiche abru chaDhi chitwan ghazab badle hue tewar

ba-shakl-e-KHanjar-e-KHun-KHwar 'ashiq ki qaza tum ho

dam-e-raftar sae se bhi apne bach ke chalte ho

uDa rakkha hai shoKHi ne ki paband-e-haya tum ho

sanbhaalo hosh Thero phir uThana hath mein KHanjar

laDakpan hai bahut kamsin abhi nam-e-KHuda tum ho

phanse ho kis ghazab mein hazrat-e-dil kya qayamat hai

asir-e-zulf-e-pechan ho giraftar-e-bala tum ho

hamare dil mein tum aur hum tumhaare dil mein rahte hain

na kuchh tum se juda hum hain na kuchh hum se juda tum ho

nikal kar ab kahan jaoge dil se aarzu ho kar

meri hasrat mera arman mera mudda'a tum ho

mukar jate ho dil le kar zara ghairat nahin aati

baDe dam-baz ho jhuTe ho matlab-ashna tum ho

suna jab zikr chahat ka to yun andam se bole

yahi surat hai mere chahne walon mein kya tum ho

tumhaara hi tumhaara har rag-o-resha mein jalwa hai

nazar mein jaan mein aankhon mein dil mein ja-ba-ja tum ho