چھپا ہوا ہے بہت کم چھپا زیادہ ہے

چھپا ہوا ہے بہت کم چھپا زیادہ ہے

ہمیں خبر ہے خبر کیا ترا ارادہ ہے

یہ تنگ ذہن نہ سمجھیں گے اس حقیقت کو

تمہاری بزم میں کس کس کا دل کشادہ ہے

بہت سنبھال کے رکھیے گا میری مٹی کو

یہ خاک داں مری خواہش کا اک لبادہ ہے

بس ایک سمت ہی چلنے کا حکم ہے اس کو

یہ آدمی کسی شطرنج کا پیادہ ہے

سکون کا ہی مزا ہے نہ اضطراب کا لطف

خوشی بہت ہے نہ غم ہی بہت زیادہ ہے

مجھے زیادہ نہ دینا میری ضرورت سے

ہو درمیانی روش بس یہی ارادہ ہے

میں تیرا ساتھ نہ چھوڑوں گا موت سے پہلے

مری حیات مرا تجھ سے اتنا وعدہ ہے

فرشتہ ہو کے بھی انسان جیسا ہے راہبؔ

مرے حبیب کا انداز کتنا سادہ ہے