chhapa hua hai bahut kam chhupa ziyaada hai

chhapā huā hai bahut kam chhupā ziyāda hai

hameñ ḳhabar hai ḳhabar kyā tirā irāda hai

ye tang-zehn na samjheñge is haqīqat ko

tumhārī bazm meñ kis kis kā dil kushāda hai

bahut sañbhāl ke rakhiyegā merī miTTī ko

ye ḳhāk-dāñ mirī ḳhvāhish kā ik labāda hai

bas ek samt hī chalne kā hukm hai us ko

ye aadmī kisī shatranj kā piyāda hai

sukūn kā hī mazā hai na iztirāb kā lutf

ḳhushī bahut hai na ġham hī bahut ziyāda hai

mujhe ziyāda na denā merī zarūrat se

ho darmiyānī ravish bas yahī irāda hai

maiñ terā saath na chhoḌūñgā maut se pahle

mirī hayāt mirā tujh se itnā vā'da hai

farishta ho ke bhī insān jaisā hai 'rāhib'

mire habīb kā andāz kitnā saada hai

chhapa hua hai bahut kam chhupa ziyaada hai

hamein KHabar hai KHabar kya tera irada hai

ye tang-zehn na samjhenge is haqiqat ko

tumhaari bazm mein kis kis ka dil kushada hai

bahut sanbhaal ke rakhiyega meri miTTi ko

ye KHak-dan meri KHwahish ka ek labaada hai

bas ek samt hi chalne ka hukm hai us ko

ye aadmi kisi shatranj ka piyaada hai

sukun ka hi maza hai na iztirab ka lutf

KHushi bahut hai na gham hi bahut ziyaada hai

mujhe ziyaada na dena meri zarurat se

ho darmiyani rawish bas yahi irada hai

main tera sath na chhoDunga maut se pahle

meri hayat mera tujh se itna wa'da hai

farishta ho ke bhi insan jaisa hai 'rahib'

mere habib ka andaz kitna sada hai