chhape hain aap ki azmat ke ishtihaar bahut

chhape haiñ aap kī 'azmat ke ishtihār bahut

phañseñge jaal meñ merī tarah shikār bahut

ḳhabar hai in dinoñ bāzār bhaao achchhā hai

uThān par hai zamīroñ kā kārobār bahut

ye zindagī hai yahāñ milnā aur bichhaḌnā kyā

mileñge ham ko bhī dilbar tumheñ bhī yaar bahut

thā mahv-e-ḳhvāb añdheroñ kī god meñ kab se

jagā ke mujh ko ujāle haiñ sharmsār bahut

gunāh kahte the tum hī to ḳhūn-e-nāhaq ko

tumhāre qaul pe ham ko thā e'tibār bahut

hameñ kisī kī hukūmat se kyā ġharaz 'fārūq'

ye shahr-e-dil hai yahāñ apnā eqtidār bahut

chhape hain aap ki 'azmat ke ishtihaar bahut

phansenge jal mein meri tarah shikar bahut

KHabar hai in dinon bazar bhao achchha hai

uThan par hai zamiron ka karobar bahut

ye zindagi hai yahan milna aur bichhaDna kya

milenge hum ko bhi dilbar tumhein bhi yar bahut

tha mahw-e-KHwab andheron ki god mein kab se

jaga ke mujh ko ujale hain sharmsar bahut

gunah kahte the tum hi to KHun-e-nahaq ko

tumhaare qaul pe hum ko tha e'tibar bahut

hamein kisi ki hukumat se kya gharaz 'faruq'

ye shahr-e-dil hai yahan apna eqtidar bahut