چھیڑ کرنے والی زلفوں سے صبا تھی میں نہ تھا

چھیڑ کرنے والی زلفوں سے صبا تھی میں نہ تھا

مجھ سے کیوں برہم ہو تم اس کی خطا تھی میں نہ تھا

غیر ہی کے واسطے تھا آپ کا نقد کرم

غیر ہی کے واسطے حسن وفا تھی میں نہ تھا

جلوہ فرما بام پر جس دم ہوا وہ ماہ رو

ہائے اس دم ساری مخلوق خدا تھی میں نہ تھا

غیر کے پہلو میں رکھا جس نے مجھ کو بے قرار

اے ستم گر وہ مری آہ رسا تھی میں نہ تھا

جس کو سن کر رو رہے تھے آپ بھی اغیار بھی

رات وہ رقت بھری میری صدا تھی میں نہ تھا

رشک سے صابرؔ نہ کیوں ہوتا مرے ارماں کا خون

دست پا بوسیٔ جاناں کو حنا تھی میں نہ تھا