chheD ke saz-e-zargari KHalq-e-KHuda hai raqs mein

chheḌ ke sāz-e-zargarī ḳhalq-e-ḳhudā hai raqs meñ

yuuñ ki tamām shahr hī Duub chalā hai raqs meñ

ye jo nasha hai raqs kā ik mirī zaat tak nahīñ

kūza-ba-kūza gil-ba-gil saath ḳhudā hai raqs meñ

koī kisī se kyā kahe koī kisī kī kyuuñ sune!

sab kī nazar hai taal par sab kī anā hai raqs meñ

husn kī apnī ik numū ishq kī apnī hāo-hū

ek havā hai rañg meñ ek havā hai raqs meñ

kaun ye kah ke chal diyā ho tirī bastiyoñ kī ḳhair

aaj havā bhī tez hai aur diyā hai raqs meñ

koī savād-e-vaqt par koī surūd-e-zāt tak

paañv hai sab kā ek sā phir bhī judā hai raqs meñ

burj-e-shahī se dekhnā aise fishār-e-vaqt meñ

ḳhāk-ba-sar ġhazal-ba-lab kaun gadā hai raqs meñ

chheD ke saz-e-zargari KHalq-e-KHuda hai raqs mein

yun ki tamam shahr hi Dub chala hai raqs mein

ye jo nasha hai raqs ka ek meri zat tak nahin

kuza-ba-kuza gil-ba-gil sath KHuda hai raqs mein

koi kisi se kya kahe koi kisi ki kyun sune!

sab ki nazar hai tal par sab ki ana hai raqs mein

husn ki apni ek numu ishq ki apni hao-hu

ek hawa hai rang mein ek hawa hai raqs mein

kaun ye kah ke chal diya ho teri bastiyon ki KHair

aaj hawa bhi tez hai aur diya hai raqs mein

koi sawad-e-waqt par koi surud-e-zat tak

panw hai sab ka ek sa phir bhi juda hai raqs mein

burj-e-shahi se dekhna aise fishaar-e-waqt mein

KHak-ba-sar ghazal-ba-lab kaun gada hai raqs mein