chheDa hai naya naghma hayat-e-abadi ne

chheḌā hai nayā naġhma hayāt-e-abadī ne

is baar tabassum na kiyā sun ke kalī ne

lafzoñ meñ utarne kā hunar siikh rahā huuñ

ḳhatre meñ haiñ alfāz ke sīnoñ meñ dafīne

vo haiñ ki bhaTakte haiñ abhī pyaas ke maare

ham haiñ ki Dubo aa.e sarāboñ meñ safīne

suntā huuñ taḌapte hue paanī kā faqat shor

hassās banāyā hai mujhe tishna-labī ne

aflāk ke manzar haiñ mire sāmne uryāñ

baḳhshī ye bulandī mujhe be-bāl-o-parī ne

shādāb nazar aate haiñ ashjār har ik samt

kyā shahr meñ jañgal kī havā laa.ī kisī ne

pahlū meñ dhaḌaktā hai taḌaptā hai shab-o-roz

bechain kiye rakkhā hai mujh ko mire jī ne

jo rāste jaate haiñ tire arsh kī jānib

vo raste bhī dikhlā.e mujhe dar-ba-darī ne

chheDa hai naya naghma hayat-e-abadi ne

is bar tabassum na kiya sun ke kali ne

lafzon mein utarne ka hunar sikh raha hun

KHatre mein hain alfaz ke sinon mein dafine

wo hain ki bhaTakte hain abhi pyas ke mare

hum hain ki Dubo aae sarabon mein safine

sunta hun taDapte hue pani ka faqat shor

hassas banaya hai mujhe tishna-labi ne

aflak ke manzar hain mere samne uryan

baKHshi ye bulandi mujhe be-baal-o-pari ne

shadab nazar aate hain ashjar har ek samt

kya shahr mein jangal ki hawa lai kisi ne

pahlu mein dhaDakta hai taDapta hai shab-o-roz

bechain kiye rakkha hai mujh ko mere ji ne

jo raste jate hain tere arsh ki jaanib

wo raste bhi dikhlae mujhe dar-ba-dari ne